EAPN Galicia recolle boas prácticas e demandas para a mellora das políticas de inserción sociolaboral

0 645
Comparte!
Froito desta investigación resultará un manual de boas prácticas nos programas de inserción sociolaboral, que incluirá propostas de incidencia política que posibiliten o desenvolvemento de políticas sociais e de emprego eficaces, así como de programas de inclusión sociolaboral produtivos.

No marco do Programa para o fomento da empregabilidade e a inclusión sociolaboral de persoas en situación de vulnerabilidade, estamos a realizar unha investigación sobre as boas prácticas nos programas de inserción sociolaboral, que transmitiremos á Consellería de Promoción do Emprego e Igualdade para a mellor abordaxe futura no tratamento da súa inserción sociolaboral.

Pretendemos determinar as condicións necesarias para que os programas de inclusión sociolaboral resulten exitosos, xerando así unha ferramenta práctica con pautas para a súa posta en marcha. Estamos a recoller o coñecemento das 14 entidades que desenvolven o programa, e tamén doutras entidades con recoñecida experiencia na inserción sociolaboral de diversos colectivos. Por outra parte, incluímos nesta investigación a experiencia e demandas das persoas en situación de pobreza/exclusión que teñen participado no programa, para que colaboren na avaliación e deseño das políticas de emprego.

 

As principais conclusións desta investigación, no referido á configuración dos programas de inserción sociolaboral de persoas en situación de vulnerabilidade:

  • A particular situación de vulnerabilidade destas persoas require itinerarios individualizados e totalmente personalizados, que inclúan accións máis aló da formación e a procura de emprego. Cómpre traballar con elas desde catro vertentes: persoal, social, emprego e formación.
  • Para poder abordar o traballo desde as catro vertentes, requírese dun equipo multidisciplinar formado por profesionais da orientación e prospección laboral, traballo e educación social, terapia ocupacional, mediación intercultural, psicoloxía, psicopedagoxía, etc.
  • O traballo coordinado entre as entidades que desenvolven os programas de inserción sociolaboral permite ofrecer un servizo máis completo ás participantes dos programas. Ademais, traballando en rede compartimos coñecementos, experiencia e bo facer das entidades e do seu persoal técnico, o cal enriquece e mellora a calidade dos programas.

 

 

Algunhas das propostas de mellora para as políticas de emprego, xa trasladadas á Conselleira de Promoción de Emprego e Igualdade e á Directora Xeral de Formación e Colocación:

    • O proceso de inserción sociolaboral con persoas en situación ou risco de exclusión social require traballar contemplando as vertentes persoal, social e laboral, para que sexa realmente exitoso. Cómpre recoller esta metodoloxía nas convocatorias de inserción laboral, e requírese ademais dunha boa coordinación política e técnica entre as Consellerías de Promoción de Emprego e Igualdade e de Política Social.
    • Cómpre simplificar a burocracia, o que permitirá un maior tempo de atención de calidade ás participantes nos programas por parte do persoal técnico.
    • Unha maior coordinación entre os servizos de emprego, tanto autonómicos como estatais, asumindo a responsabilidade compartida para a inserción sociolaboral de persoas en situación ou risco de exclusión social.
    • Itinerarios plurianuais: as persoas en situación ou risco de exclusión social requiren máis tempo -entre dous e catro anos- para recuperar ou adquirir empregabilidade e acadar a inserción sociolaboral.
    • Acceso ao programa a persoas en situación ou risco de exclusión social que actualmente non teñen acceso, e que precisan do apoio para a súa inserción sociolaboral, como por exemplo persoas en situación administrativa irregular, persoas subempregadas por insuficiencia de horas que figuran no SPEG como demandantes de emprego ocupadas (con contratos precarios de poucas horas de duración).
    • Facer os programas de emprego compatibles con outras accións que resultarían beneficiosas para completar o itinerario, como poden ser as formacións AFD.
    • Incluír no programa de emprego apoios ás participantes en forma de bolsas para o transporte, e axudas á conciliación familiar.

Mais info: #UnhaVidaDignaUnTraballoDigno

Similar articles

Fai un comentario

O seu email non será publicado. Os campos marcados son obrigatorios *

*

CONTACTO

Pza. Camilo Díaz Baliño, 17
(Centro de negocios ESMARTA)
Santiago de Compostela
15704 A Coruña
Teléfono: 698 12 71 10

Traducir

GalegoEspañol

Uso de cookies

Este sitio web utiliza cookies para que vostede teña a mellor experiencia de usuario. Se continúa navegando está dando o seu consentimento para a aceptación das devanditas cookies e a aceptación da nosa política de cookiespique no enlace para maior información.

ACEPTAR
Aviso de cookies