O pasado 2 de marzo de 2023 a EAPN Galicia e o seu Grupo de Inclusión organizaron o seminario online “Garantía de ingresos en Galicia: Cara a unha nova Lei de Inclusión”.

Coa inminente actualización da Lei de Inclusión de Galicia, esta xornada pretendíu servir de espazo de reflexión e debate propositivo, para comezar a construír unha batería de propostas á nova Lei.

A xornada ‘Garantía de ingresos en Galicia: Cara a unha nova Lei de Inclusión’ configurouse como o primeiro espazo de reflexión e debate no que EAPN Galicia e as súas entidades membro, especialmente as 21 integrantes do Grupo de Inclusión da rede, pretenderon iniciar a súa información e preparación de cara ao proceso de actualización da Lei de Inclusión de Galicia.

Tratouse dunha xornada online, con espazo en plenario e mesas redondas, dirixida a persoal de entidades sociais de Galicia, co obxectivo de situar o debate e presentar os principais retos e oportunidades aos que debemos facer fronte cando falamos de rendas mínimas.

O IMV e as Políticas de Garantía de Ingresos nas CCAA

A pesar da existencia de dificultades de coordinación, de burocracia, etc, nestes últimos anos vimos de corroborar a eficacia de certas medidas para loitar contra a pobreza.

Dende medidas estatais como o ERTE ou o propio Ingreso Mínimo Vital, ata medidas autonómicas postas en marcha dende a Xunta de Galicia, especialmente na Consellería de Política Social, como a non paralización da RISGA, e outras máis innovadoras como a Tarxeta Básica.

Unha das liñas de incidencia da EAPN Galicia é que un sistema de garantía de rendas debe ser áxil, eficiente e non deixar a ninguén atrás, e por iso quixemos contar con diferentes expertas voces neste proceso como Miguel Laparra, profesor titular de Política Social na UPNA; Inmaculada Herránz, profesora titular de Sociología da UCLM; Alfonso López, coordinador de EAPN Euskadi e do Grupo de Inclusión de EAPN España, Carlos Santos, Xefe do Servizo de Servicios Sociais do concello da Coruña; Ana Aboy e Inmaculada López, da Subdirección Xeral de Prestacións e Programas de Inclusión da Xunta de Galicia; e Sara Abella, coordinadora do Proxecto Acceso Vital de EAPN Galicia.

Das súas intervencións extraense diferentes retos sobre o IMV para abordar de cara a futuro, entre os que se atopan o aumento das contías das prestacións, as cales se deben establecer segundo o umbral de pobreza autonómica; a complementación do IMV coa renda autonómica de cada CCAA; o establecemento dun sistema de transición a un emprego protexido que estea acompañado de itinerarios de inclusión; a implementación e a ampliación das unidades de tramitación a nivel local, recoñecendo a importancia do acompañamento neste proceso, especialmente por parte das entidades do terceiro sector. Finalmente, remarcouse tanto a ampliación da cobertura do IMV aos colectivos aos que chega, mellorando os requisitos de acceso e promovendo unha xestión da prestación máis eficaz, como a únificación da tramitación a través dunha ventanilla única.

Dende a rede levamos anos traballando nesta liña, especialmente dende a posta en marcha do Ingreso Mínimo Vital, cando se puxo de manifesto a necesidade de adecuar o sistema autonómico a un novo dereito subxectivo a nivel estatal. As demandas das que partimos e nas que traballará o grupo de inclusión para formular as nosas propostas á Lei de Inclusión son:

1. 1. Un sistema de rendas mínimas debe garantir axilidade e a mínima burocracia.
   2. Reformulación e simplificación das AIS. Xa que son axudas para emerxencias sobrevidas, polo que estas axudas deberíanse tramitar axilmente no prazo dunha semana, cunha comprobación posterior dos requisitos.
   3. No cálculo da RISGA deberíase ter en conta o SMI, e non o IPREM.
   4. Complementar ao IMV a donde este non chega, a nivel de rendas e de cobertura. A RISGA debe complementar o aportado polo IMV ata o limiar de pobreza relativa a nivel de renda, para superar estas situacións, non so tratar a pobreza severa. Asimesmo debe ampliar a cobertura a colectivos non atendidos ou de especial vulnerabilidade (senfogarismo, en situación irregular…).
   5. Garantir o dereito a unha inclusión persoal, social e laboral, que sexa dereito, non obriga. As rendas mínimas son entendidas como unha medida temporal mentres non haxa unha situacion de emprego, pero baixo esta lóxica quedan fora certos colectivos que teñen dificultade para acadar a inserción laboral ou mesmo lles é imposible.
   6. Acompañamento integral dende servizos sociais ou entidades do terceiro sector.

Material y documentación relacionada:

• O Ingreso Mínimo Vital (IMV) e o seu encaixe en Galicia. Inmaculada Herránz
• O Ingreso Mínimo Vital (IMV) e o seu encaixe en Galicia. Miguel Laparra
• O Ingreso Mínimo Vital (IMV) e o seu encaixe en Galicia. Alfonso López
• Retos e oportunidades da nova Lei de Inclusión de Galicia. Sara Abella